خُفیہ پولیس۔۔۔۔۔۔۔(ہیک پہاڑی افسانہ)

مہاڑی آپا میں کولا چھ سال بڑی دی۔ مہاڑی ہیک کزن( ابے ہوریں نے مانویں نے جنگتے نی کُڑی) وی مُولیھ مہاڑیا آپا روٹھی دی،بس کوئی د و ہیک مہینے او مہاڑیا آپا کولا نِکی دی۔

اُس وی اُس نے پہیرنی پرا آپا ایہہ آخنے سے۔ جدوں او ساڑے کہر ایہنی سی تے میں کیا بڑا رپھڑ ہوئی ایناسا کہ میں ہیس آپا آخاںتے دُوئی وی بولی آچھیھ۔ آخر مہاڑے دماغے وِچ ہیک گل آئی کہ کیاں نہ میں جہیڑی آپا دو مہینے نِکی دی اُس نِکی آپا ایہہ آخنی وہاں تے جدوں دوئے کہٹھیاں وہین تے آپنیاں آپا بڑی آپا آخے نے چکریچا تے نِکلی آچھاں ۔

او تیہاڑا تے ایہہ تیہاڑا مہاڑی آپا خالی آپا دی تے او نِکی آپا ۔اُنھیں ناں کہر کُھریا، کُھریا نے بگلے وچ سا، ساڑھے کہریہہ کولا زیادہ دُور نیسا ۔

ابے ہوریں نے او مالیر تے اُنھیں نے جنگیت کُڑیاں آنسیں کنے حِلص وی بہوں کرنے سے۔ نکوٹیاں جدوں میں اُنھیں نے کہر گچھاں تے نِکی آپا آپنیاں نکیاپہنوں تھی زیادہ مہاڑا خیال رکھے،میں کنے روٹی کھاوائے،راتی کول لیٹائے۔ میں اُس کنے بہوں ہیلی مِلی گیئیوس۔

کُھریا نے بگلے والے نیاں دو کُڑیاں ٹوپیا وی بیائیاں نِئیاں سِیاں۔ جدوں کُوتے میں کُھریا گچھاں تے بِچ ودھ کوتے کوئی ٹوپیالیں ناں وی آیا ناں ہونا سا۔ مجید انکل وِی ٹوپیا ناں ایہہ سا جیھڑا میں اُتھین ایہہ دو ہیک دفعہ ملیا سا۔ کُھریا نے بگلے والیں اُس ناں تعارف کرایا سا آخے او خفیہ پولیس وچ دا تے اَج کل راولاکوٹ ڈُوٹی کرنا۔

ساڑے دور وچ کُڑیاں شاذر ناظر ایہہ بزاریہچ گہینیاں سییاں۔ کدے کوتے کوئی گچھے وی تے کُسے مردیہہ کنے یا دُوئیا کڑیا ہِنی گینی سِی۔ کہلیا کُڑیا نا بزاریچ گچھے نا کوئی تصور وی نیہسا۔ نکیا آپا جدوں وی بزاریچ گچھے جوغا ویہہ تے او میں ایہہ کنے ہِنی گچھے۔ کدے کُوتے کوئی ضروری کم ہوئیس تے امیاں ہوریں آخی تے سکولیچا چُھٹی کرائی وی کنے ہِنی گچھے۔ ہیک تیہاڑے نِکی آپا میں سکولیچا ٹکائی تے راولاکوٹ ہِنی گئی۔ جس تیہاڑے نِکی آپا میں بزاریچ ہِنی گینی سی اُس تیہاڑے بس سمجھی نا مہاڑی عید ہونی سی۔ نِکی آپا میں جلیویاں،پکوڑے،چنا چاٹ،املی تے بیک بیک ناں جِیکی کھاوائے،کدے ہوٹلیر چکن کڑاہی کھاوا ئے تے کدے تِکے۔کہرے جُلے تھی پہلے کوئی کھیڑولا وی ہِنی دیئی شوڑے۔ میں کولا پُچھنی ہونی سی آخے کیہہ ہِنی دِیں تے میں زیادہ تر گُڈیاں ایہہ ہِنناں۔ میں ہنچھی ساری بڑی ہوئی نی وی گُڈییں کنے ایہہ کھیڑاں۔

اُس تیہاڑے نِکیا آپا نِکوٹیاں کیا گرمییںنے کپڑے لوڑنے سے،او میں ہِنی تے تیہاڑی نالے بزاریچ پِھرنی ہوئی،میں گُڈی ہیک وی ہِنی دیتیون۔ تہیاڑی کپڑے لوڑیا کہمتالی سو دکاناں پھری پھری تے ہُن جنگیں لہر لغی نی سی، نِکی آپا آخنے لغی اڈے لیہہ جُلنیاں تے اُتیہہ کولا کی کھائی تے گڈیارچڑھنیاں۔ ڈاخانے کولا چڑھنِیاں سیاں تے دیکھاں آگیٹا ٹوپیالیں ناں مجید انکل اینا۔ آنسیر نظر پئیوس تے کھلی آنسیں کولا بل خیر پُچھنے لغا۔ بل خیر پُچھی ،اندرالییں ساریں کیا پُچھی تے یو وی پُچھیون کہ آنس بزاریچ کیاں آئی نیاں سِیاں، فیرروٹیا کیا تہانونے لغا۔تہاونونے کیہہ لغا مُولیھ چُورو بنی چمٹی گا۔ تیہاڑی بتی بتی ایہہ آنسیں پُہکھ وی بہوں لغی نی سی تے اُوپرا ا ٓپا دیکھیا کہ یو کی کھادے پیتے تھی بغیر نہیں گیہنے دِینا تے آخنے لغی جُل فیر کی کھائی ایہہ جُلاں مجید انکل بہوں ناراض ہونے۔

او آنسیں اُپرلے پاسے عدالتی والیا روڑار تِکے والے ہیس کول ہِنی گئے۔ میں اس تِکے والے کول آپا کنے پہلے وی آئی نی سِیوس۔ اُس اندر جے ہیک میلودا جا کپڑا لڑکائی تے کُڑییں نے بیجھے نی جغہ وی بنائی نی سی۔ جدوں میں اُتھین نِکیا آپاکنے پہلے تِکے کھادیا گئی سیوس تے آنس اندر ایہہ بیٹھیاں سئیاں۔آپا اُس ویلے آخیا سا آخیہہ ایتھین آنیارا جا وی دا تے ساہ وی رُکنا۔ میں نی پتہ اُس تیہاڑے نکیا آپا پَچھرلیا دفعہ نی گل یاد ہوئی یا مجید انکل نیاں بیٹھی نیاں مُچھاں دیکھی تے کوئی ڈر لغیس، او اُتھین پردے نے باہرلے پاسے مردیں نے پاسیچ ایہہ بیجھی گئی۔

مجید انکل مسیں تِکے تے روٹیاں آرڈر کیتے سے تے باہرا سڑکارا ہیک ٹیڈی جئیی کُڑی ہیک اندر آئی،مجید انکل بغیر سلام دعائی تھی ایہہ اُٹھی چڑھائی کری ایس آخے پتہ نی کہڑیے جئیے تُو روز تہیاڑے بزاریچ کہلی پھرنی ہونی ایں،تُو گدریں کنے لمیاں لائی نیاں۔ کُڑی بہت غصےیچ مُڑی پئی گئیوس آخے تُو کُسے نیاں تہیو پہنُوں بدنام کرنا ایں ،تُس لوک قانون نے راخے دیا،شرم کرا کُسے نیاں تیہُو پہنور الزام لانیاں۔ یو کی بُجھی تے مجید انکل ہور کریڑی چڑھی تے آخنے لغیس میں فلانے تیہاڑے تُو فلانے ہوٹلے نے کمیریچ دیکھی سیئیں تے فلانے ٹیم فلانے کنے اُس نیاں گڈیار بیجھی تے فلانیاں روڑارا لنگنی سئییں۔ مجید انکلیھ کولا آپنا روزنامچہ جا بُجھی تے کُڑی کی بانی بانی اُس میلودے جے پردے پیچھے گئی اُٹھی۔

مجید انکل اُٹھیا،اُٹھی تے تِکے والے نے کنے وچ کی بائی تے او وی اندرلے پاسے لنگی گا،کہڑوٹیا ہیس بعد ساڑے تِکے ،روٹیاں تے تمبریہہ نی چٹنی آئی اُوٹھی۔ نِکی آپا میں آخنے لغی تُو کھانا کھا،مجید انکل حالے ڈُوٹی کرنا،جدوں فارغ واہا تے کھانا ہوسی،آنسیں کول اتنا ٹیم کھان دا کہ انتظار کرنیاں وہاں۔

اندر مجید انکل وی تے او کُڑی وی لاغاتار کُہُلے پئے نے،کُڑی وی بہوں تِڑی تِڑی پئیس ۔مجید انکل آخیس،تُو جے لوکیں سارا محول معاشرہ خراب کیتا نا۔ میں ایہہ ہُن تھانے وچ فون کرنیس دو تیہاڑے تُو حوالات وچ لانی ناں تے فیر تُو قانون سمجھ ایئسی اُٹھی۔ جدوں اُنھی یو گل بائی تے ساڑھے تِکے حالے تقریباََ اَدھے رہنے سے،فیر اندرکی چول خاموشی جیئی ہوئی گئی۔ او دوئے کی گوشے گوشے گلاں بانے لغے۔

کہڑی ہیک سی تے اندرا چمیں نے پٹکار اُٹھنے لغے۔ نِکیا آپا اُتھیں کول پئے نے اخبار نے جمعہ میگزین نے دو ہیک برقے پاڑی تے آپنیاں تے مہاڑیا پلیٹا چا تِکے اُس وچ بائی تے ہتھیچ ٹنگی تے میں آخیا۔۔۔۔۔

جلدی اُٹھ تے جُلاں۔۔۔۔۔۔”ایتھین خفیہ پولیس نی تفتیش شروع ہوئی گئی“۔

یو کی بائی تے نِکی آپا نسنی باہر نِکتھی تے اُس پِچھے پِچھے میں،بُن اولی آنس اَڈیرا گڈیارچڑھیاں۔

سارے رستے میں ویگناں نیاں سیکنڈ سِیٹار بیٹھی نی سوچنی کہر پُجیوس اللہ فے خفیہ پولیس نی ڈُوٹی اییہیہ ہونی۔

Leave a Reply

Translate »
%d bloggers like this: