حقوق انسانی کی تنظیم ‘قومی مہم کے خلاف تشدد ‘(این سی اے ٹی)نے دعویٰ کیا ہے کہ بھارت میں ہر روز 96 بچوں کو تشدد کا نشانہ بنایا جاتا ہے جبکہ بچوں کی نگہداشت کے اداروں(سی سی آئی)میں رہائش پذیر 4 لاکھ بچوں کو زیادہ خطرات لاحق ہے۔
بچوں کے حقوق سے متعلق اقوام متحدہ کے کنونشن کی 20 ویں سالگرہ کے موقع پر ، بھارت میں بچوں پر تشدد اور جنسی استحصال کے بارے میں اپنی رپورٹ جاری کرتے ہوئے ، این سی اے ٹی نے کہا کہ مدھیہ پردیش سرفہرست ،جبکہ آسام دوسرے نمبر پر ہے۔
این سی اے ٹی نے کہا ، نیشنل کرائم ریکارڈ بیورو (این سی آر بی)نے 2017 کی رپورٹ میں 4857بچوں پر تشدد اور30123 بچوں کے ساتھ جنسی زیادتی ریکارڈ کی ہے یعنی روزانہ تقریبا 96 بچوں کو نشانہ بنایا جاتا ہے۔
خبر رساں ادارے ساؤتھ ایشین وائرکی رپورٹ کے مطابق 2017 میں ، سب سے زیادہ بچوں پر تشدد کے معاملات میں مدھیہ پردیش میں 1638، آسام1127، مہاراشٹرا 377 ، چھتیس گڑھ 370 ، اترپردیش 244 ، مغربی بنگال میں 247 متاثرین کے کیس رپورٹ ہوئے۔ جبکہ تمل ناڈو179 ، کیرالہ 178 ، دہلی 97 اور آندھرا پردیش میں120 متاثرین ہیں۔ایک نیوز ویب سائٹ القمرآن لائن کے مطابق این سی اے ٹی کے کوآرڈینیٹر سہاس چکما نے کہا کہ بچوں کو باقاعدگی سے پولیس لاک اپ میں حراست میں لیا جاتا ہے اور اعتراف جرم کروانے کے لئے ان پر تشدد کیا جاتا ہے۔
انہوں نے یہ بھی کہا کہ 13 اپریل کو ممبئی کے گورنمنٹ ریلوے پولیس وڈالا کی تحویل میں 17 سالہ نابالغ لڑکے کی موت اور رودر پور کے سیدکول پولیس اسٹیشن میں 17 سالہ بیٹے برجندر سنگھ رانا کی موت، گیارہ جولائی کو اتراکھنڈ کے ضلع ادھم سنگھ نگر ضلعے میں “بچوں پر تشدد کا بے دریغ استعمال” کیا گیاتھا۔
تنظیم نے الزام لگایا کہ متعدد ریاستیں جووینائل جسٹس بورڈ (جے جے بی) کے ذریعہ مقدمے کی سماعت کے دوران کمسن بچوں کو رکھنے کے لئے مناسب تعداد میں آبزرویشن ہومز قائم کرنے میں ناکام رہا ہے اور پولیس لاک اپ میں بچوں کی نظربندی ایک عام رواج ہے۔
القمرآن لائن کے مطابق ہندوستان میں 718 اضلاع ہیں ، لیکن دستیاب تازہ ترین اعداد و شمار کے مطابق ، 3 اگست ، 2018 تک ، بھارت میںصرف 301 آبزرویشن ہومز ، 31 خصوصی گھر ، 21 آبزرویشن کے خصوصی مکانات موجود تھے۔
این سی اے ٹی نے کہاکہ اس سے یہ ظاہر ہوتا ہے کہ 396 اضلاع میں آبزرویشن ہومز نہیں تھے ، 666 اضلاع میں خصوصی مکانات نہیں تھے اور 709 اضلاع میں بچوں کی رہائش کے لئے جگہ کی حفاظت کی سہولت موجود نہیں تھی اور اس کے نتیجے میں ، پولیس کے ہاتھوں نابالغ بچوں کو بھی خطرہ لاحق ہے۔